Укытучы! Син – кояшы Мәктәп дигән нәни дөньяның!
Зөлфия Нуретдин кызы Батаева,Зәй районы, Түбән Биш урта мәктәбенең 1 нче квалификация категорияле татар теле һәм әдәбияты укытучысы, эш стажы – 24 ел. Хезмәтем минем – мәңге картаймас шатлыгым чыган...
Зәй районы, Түбән Биш урта мәктәбенең 1 нче квалификация категорияле татар теле һәм әдәбияты укытучысы, эш стажы – 24 ел.
Хезмәтем минем – мәңге картаймас шатлыгым чыганагы. Әйе, бу чынлап та шулай, чөнки мин – укытучы. Укытучы... Укытучы нинди кыска, әмма үзенә күпме мәгънәне сыйдырганын, беркем дә санап бетерә алмас. Ул укучыларга белем бирүче мөгаллим генә түгел, сыйфатлы тәрбия бирүче шәхес тә. Укытучыларыбызның бөтен тырышлыгы гармонияле үсешкә ирешкән шәхес тәрбияләүгә юнәлтелгән. Укучылар дәресләрдә төпле белем алу белән генә чикләнмичә, логик фикер йөртергә, нәтиҗәләр ясарга өйрәнәләр. А.Фадеев «Яшь гвардия» романы геройларының берсе Матвей Шульга сүзләре белән укытучы эшчәнлегенә мондый бәя бирә. «Укытучы! Сүзе дә нинди бит!.. Укытучы! Әйтергә генә җиңел! Бездә, һәр бала мәктәптә укыган илдә, укытучы – беренче кеше ул. Балаларыбызның, халкыбызның киләчәге – укытучы кулында, аның алтын йөрәгендә. Аны урамда күргәч тә без илле адым килеп җиткәнче үк хөрмәт йөзеннән баш киемебезне салырга тиешбез», – дип матур сүзләр язып калдырган.
Мин 24 ел гомеремне балаларны укытуга багышлаган кешеләрнең берсе. Бу һөнәрне сайларга нәрсә этәргәндер, хәзер инде истә дә түгел. Әлбәттә, замана күзлегеннән караганда балаларга белем һәм тәрбия бирү җиңел хезмәтләрдән түгел, ләкин әгәр дә син үз эшеңне яратып башкарасың икән, хезмәтеңнән канәгатьләнү тойгысы, шатлык хисләре чолгап алганын сизми дә каласың. Шуңа күрә дә авыр һәм җаваплы булуына да карамастан, укытучылык һөнәрен сайлавыма һич тә үкенмим. Ә үз эшеңне яратып башкару ничек кенә авыр булмасын, ул үзе – зур бәхет. Бу тарафтан мин үземне бәхетле кеше дип саныйм. Бөтендөнья белем бирү процессының мөһим һәм тотрыклы тармагы – белем бирүдә заманча информацион технологияләр куллану. Бүгенге балалар мәгълүмати технологияләр белән бик иртә таныша. Шуңа да еш кына укучы бүген укытучыга караганда да күбрәк белә. Әгәр дә элек мәктәп баласы өчен мәгълүмат чыганагы булып китап һәм укытучы торса, бүген ул кызыксындырган сорауларга җавапны интернет челтәре аша таба. Шуңа күрә дә безгә, хәзерге заман укытучыларына, үз фәнең белән кызыксындыру, аларның игътибарын юнәлтү өчен төрле ысуллар уйлап табарга, шул ук мәглүмати технологияләрне үзләштерергә һәм аларны укыту процессында кулланырга тиешбез. Бүгенге заман укытучысыннан бик күп нәрсә таләп ителә. Үз фәнеңне бик яхшы белү, балаларны яратудан тыш, аларның фикерләү сәләтен үстерү, уку-танып белү эшчәнлеген оештыру, рухи һәм физик үсешен тәэмин итү. Ә моның өчен укытучыдан үз шәхесенә тәнкыйть күзлегеннән карау, яңалыкка омтылу, заман сулышын тоеп, белемне өзлексез камилләштерү, укыту-тәрбия процессына сизелерлек йогынты ясый. Ул белем бирү процессын үтемлерәк итәргә, белемне кабул итү тизлеген арттырырга, зур күләмдәге материалны аңлап, тирәнтен үзләштерергә ярдәм итә.
Хәзерге заман авыл укытучысы һәм авыл мәктәбенә килгәндә, безнең мәктәпләр кайбер шәһәр мәктәпләреннән аерылгысыз. Чиста, пөхтә, иркен классларда укучыларга белем бирүе үзе бер рәхәтлек бирә. Сыйфатлы белем бирү ягыннан да беркемнән дә калышмыйбыз. Мин үзем авыл укытучысы булуым белән горурланам. Һәм йомгаклап шуны әйтәсем килә: авыл мәктәпләренең киләчәгенә балта чапмыйк, ә киресенчә, мәктәпләрне ябуга юл куймыйк, чөнки безнең мәшһүр артистларыбыз, профессорларыбыз, танылган язучыларыбыз – барысы да авыл мәктәбен тәмамлаган күренекле шәхесләр бит.
Язмага реакция белдерегез
Вход на сайт
Авыл мәктәбе XXI гасырның тормыш мәктәбе була аламы?
Рәмзия Хаккый кызы Зиннәтуллина,Менделеев районы Турай урта мәктәбе, югары категорияле физик тәрбия һәм тормыш иминлеге нигезләре укытучысы. эш стажы - 24 ел. Туган як, туган җир, туган авыл... кадерл...
Менделеев районы Турай урта мәктәбе, югары категорияле физик тәрбия һәм тормыш иминлеге нигезләре укытучысы. эш стажы - 24 ел.
Туган як, туган җир, туган авыл... кадерле мәктәбем! Алар безнең үткән тарихыбыз, якты киләчәгебездә чагыла. Мәктәп. Укытучы... Күпләребез өчен бу сүз изге булып санала... Күренекле галимнәр, танылган язучылар, шагыйрьләр, атаклы рәссамнар, синдә тәрбияләнгән авыл мәктәбе!
Хәзерге заман авыл мәктәбе ул – социаль, мәдәни һәм белем бирү үзәге, яңа тормышка әзерләү мәктәбе. Яңа тормышка әзерлек нәрсәләрне үз эченә ала соң? Беренчедән, баланың интеллектуаль һәм рухи үсеше. Дөресен әйткәндә, шәһәр баласына яшь буынның сәләтләрен үстерү өчен мөмкинлекләр күбрәк. Мәктәпләрдән тыш, күп кенә түгәрәкләр, иҗат берләшмәләре эшли. Ә авылда мәктәп шушы барлык оешмаларнын вазифаларын үз өстенә ала. Шуңа күрә авыл укытучыларының осталыгы зур роль уйный. Ул замана белән бергә атлаучы, иҗади, һәрбер яңалыкка игътибарлы, кызыксынучан, балаларны үз көчләренә ышанырга, сәләтләрен үстерергә, алга омтылырга өйрәтүче абруйлы шәхес.
Җәмгыятьтә бара торган үзгәрешләр хәзерге заман авыл укытучысына да яңа таләпләр куя. Чыннан да, авыл мәктәбен үзгәрешләр уратып узмады. Мәсәлән, мин үзем 20 елга якын башлангыч сыйныф укытучысы булып эшләдем, өстәмә белем алып, физик тәрбия һәм тормыш иминлеге нигезләрен укытам. Ярый әле кечкенәдән спортка бирелеп, сәламәт булып үскәнбез, юкса, бетмәс-төкәнмәс ярышлар, бәйгеләрдә катнашырга көч җитәр идеме? Һәр дәрестә һәм дәрестән тыш чараларда сәламәт яшәү, туган якка мәхәббәт, патриотик аң формалаштыруны бурыч итеп куям. Эшемнән ләззәт табам, бөтен белемемне, бар шатлыгымны, йөрәк җылымны балаларга бирәм. Яңа заман авыл укытучысы – һәркайда үрнәк кеше: язучы, рәссам, спортчы, биюче, хуҗалыгын заман таләпләренә туры китереп алып баручы да. Бер яктан карасаң, хәрби хезмәткә өйрәнү дәресләрен ир-атлар укытса, күпкә үтемлерәк булыр иде дә бит... Шулай булса да, районда уздырылган йөзү, кул көрәше, чаңгы, волейбол ярышларында актив катнашып, призлы урыннар яулыйм. «Ел тормыш иминлеге нигезләре укытучы - 2014» республика күләм бәйгесендә катнашып, III нче урын яуладым.
Укучырыбыз төрле спорт түгәрәкләренә теләп йөриләр. Авыл укытучысына районда уздырылган ярышларда катнашу өчен балаларны алып бару мәсьәләсе бик зур проблема булып тора. Кызганычка каршы, ярышларга йөргән өчен өстәмә түләү дә бетерелде. Районда, республикада алган җиңүләребез яңа үрләргә менәргә көч бирә, барлык авырлыклар онытыла. Район үзәге Менделеев шәһәренә укучыларны атна саен бассейнга, боз сараена йөртәбез. Йөзү яшь организмның үсешенә уңай тәэсир итә, аны ныгыта, умыртка сөяге белән булган проблемаларны да чишәргә булыша.
Мәктәп дәрестән соң да шау-гөр килеп тора, мин - өстәмә белем бирү педагогы. Мәктәп музее житәкчесе буларак авылыбыз тарихы, гореф-гадәтләре, күренекле кешеләре турында тирәнтен эзләнү эшләре белән мәш киләбез, төрле дәрәҗәдәге фәнни-гамәли конференцияләрдә югары үрләр яулыйбыз. Республикада мәктәп музейлары арасында уздырылган бәйгедә этнография залы I урынга чыгуы безнең хезмәтебезне югары бәяләде. Уңышларыбыз белән бер рәттән безне хәзерге авыл мәктәпләрендә балалар саны елдан-ел кимүе борчый. Мәгърифәт учагын саклап калып булса иде!
“Авыл мәктәбе XXI гасырның тормыш мәктәбе була аламы?” - дигән сорауга жавап биреп: “Әйе, була ала,” – дип әйтер идем. Һөнәрем – яшәү рәвешем. Укытучы үз эшенә гашыйк, чын куңелдән бирелеп эшләсә, ул әллә нинди зур үрләр яуларга сәләтле!
Следите за самым важным и интересным в Telegram-каналеТатмедиа
Яңалыклар битенә керегез
ТӘКЪДИМ ИТӘБЕЗ
Комментарийлар