Дөнья буйлап Сабантуйлар саны арта

Татарстанда укытучыларны кыскарту яки аларның дәресләре күләмен киметү фактлары турында көн саен диярлек ишетеп торабыз. Аның каравы, татарның милли бәйрәмнәрен үткәрү саны артып тора.

Әйтик, 2017 елда гына дөнья буйлап 330 Сабантуй бәйрәме оештырылган икән, аларда 31 илдән, Русиянең 51 төбәгеннән 2 миллион кеше катнашкан. Бу хакта Татарстанның мәдәният министры Айрат Сибагатуллин ведомствоның нәтиҗәләр ясау коллегиясендә сөйләде.

Министр фикеренчә, мәдәният өлкәсе алдында куелган максатлар тормышка ашырылды. Узган елның иң зур казанышы буларак ул Зөя утрау-шәһәрчегендә урнашкан Успенский соборын ЮНЕСКО исемлегенә керүен билгеләп үтте.