«Балыкчы бакчасы»нда моң агыла

Казан бакчалары кышкы чорда тынып кала, Киров районындагы «Балыкчы бакчасы» гына кышкы йокыга таласы килми. 

18 гыйнварда кичен «Атмосфера» вокаль ансамбле биредә яшәүчеләргә һәм башкалабыз кунакларына моңлы көйләр,  җырлар  бүләк итмәкче. «Бу чара 7 гыйнварда ук узарга тиеш иде, әмма салкыннар булу сәбәпле, җылырак вакытка күчерелде», – дип хәбәр итә шәһәрнең  парклар һәм скверлар дирекциясе. 

Шунысын да әйтик: бу музыкаль коллективның кышкы чорда бакча һәм паркларда беренче генә чыгышлары түгел. Башка елларда «Атмосфера» үз талантларын Горький паркында, Лядский бакчасында җыелган тамашасына күрсәтергә өлгерде инде.

Альберт САБИР
Фото архивтан алынды