Безнең «Динамо» волейболчылары тагын Европа чемпионы!

21 октября 2019 Мәгариф

«Татар-информ» мәгълүмат агентлыгында журналистлар «Динамо-Казан» хатын-кызлар волейбол клубы уенчылары: команда капитаны Людмила Гыйләҗетдинова, Татьяна Вәлиева-Фукс, Россия җыелма командасы баш тренеры Андрей Лебедев һәм ТР «Динамо» физкультура-спорт җәмгыяте рәисенең беренче урынбасары Салават Гайсин белән очрашты.
Спортчылар каләм әһелләре янына Чехия башкаласы Прагада һәм Одолена-Вода каласында волейбол буенча хатын-кыз полицейскийлар арасында 7-14 октябрьдә узган Европа чемпионатында җиңү яулаулары турында сөйләргә килгәннәр иде. Куанычларын безнең белән уртаклашу өчен үзләре белән җиңү кубогын да алганнар иде якташларыбыз.
Хатын-кыз полицейский арасында волейбол буенча Европа чемпионнары яулаган бүләкләрен иң башта Татарстанның «Динамо» җәмгыяте рәисе, ТР Президенты Аппараты җитәкчесе Әсгать Сәфәровка тапшыра. Чемпионатта Россияне «Динамо-Казан» хатын-кызлар волейбол клубы уенчылары тәкъдим итә.
Европа чемпионы титулын икенче мәртәбә яулау юлында безнең команда башта В төркемендә, ышанычлы рәвештә, 3:0 исәбе белән Греция, Венгрия һәм Бөекбритания җыелма командаларын отты һәм, беренче урынны яулап, хәлиткеч матчлар сериясенә чыкты.
Ярымфиналда россиялеләргә көндәше булып, А төркемендә кискен көрәштә 2 урынны яулаган Германия волейболчылары чыкты. Башта безнең волейболчылар беренче очрашуны 25:21 исәбе белән отты, аннары 22:25 һәм 19:25 исәпләре белән ике тапкыр рәттән оттырды, әмма уенның дүртенче өлешендә үзләрен кулга алып, көндәшне 25:20 исәбе белән отуга ирештеләр һәм уенны тигезләделәр. Хәлиткеч бишенче уенда безнекеләрне туктатырлык түгел иде. Шулай итеп, алар алманлыларны 15:2 исәбе белән җиңүгә иреште.
Икенче төркемдәге ярымфиналда Греция командасын 3:0 белән отып, финалга Чехия командасы чыкты. Хәлиткеч очрашуда беренче уенны 26:24 исәбе белән мәйдан хуҗалары отты. Әмма шундый кыен хәлдә дә Татарстан уенчыларының җиңү теләге көндәшләренекеннән көчлерәк иде. Алар башта 25:18 исәбе белән җиңеп, чехларны «җилләтеп» алды. Аннары калган ике уенда 25:17 һәм 25:19 исәпләре белән отып, көндәшләргә чемпионатта кем хуҗа булуын төшендерделәр. Нәтиҗәдә, 3:1 исәбе белән отып, волейбол буенча Россия җыелма командасы хатын-кыз полицейскийлар арасында Европа чемпионы исемен яулады.
Безнең команда полицейскийлар арасында Европа чемпионы титулын моннан өч ел элек яулаган иде. Бу вакытта чемпионат башкалабыз Казанда узган иде. Җиңү җиңүчеләргә килешә!