Камил хәзрәт Сәмигуллин: «Өммәтебезнең киләчәге мөгаллимнәрнең эшчәнлегеннән тора»
30-31нче октябрьдә Казанда мөселман уку йортлары укытучыларының халыкара катнашу белән уздырылучы “Россия мөселманнарының гражданлык үзенчәлеге нигезе буларак традицион рухи-әхлакый кыйммәтләр” дип исемләнгән XIII Бөтенроссия форумы булып узды.
Әлеге чара Россия ислам институты тарафыннан Татарстан мөселманнары Диния нәзарәте белән берлектә Ислам мәдәниятенә, фәненә һәм мәгарифенә ярдәм фонды теләктәшлегендә үткәрелә.Ел саен үткәрелә торган форум Россиядә хәзерге заман мөселман мәгарифенең актуаль проблемалары буенча фикер алышу мәйданчыгы булып тора.
Форумда Татарстанның барлык районнарыннан, Россиянең төбәкләреннән, Сирия һәм Мисырдан, Берләшкән Гарәп Әмирлекләреннән, Казахстаннан килгән 500дән артык мөгаллим, төрле дәрәҗәдәге мәгариф, белем бирү уку йортларыннан җитәкчеләре катнашты.
Беренче көнне мәчет каршындагы курс укытучылары җыелган булса, бүген исә мәдрәсәләр, Россиянең, якын һәм ерак чит илләрнең югары уку йортлары укытучылары тәҗрибә уртаклашты.
Пленар утырышта Татарстан Мөфтие, шәригать фәннәре докторы Камил хәзрәт Сәмигуллин, ТР Рәисе Эчке сәясәт мәсьәләләре департаментының дини берләшмәләр белән хезмәттәшлек идарәсе башлыгы Альберт Дирзизов, ТР Мәгариф һәм фән министры урынбасары Минзәлия Закирова, Бөтендөнья татар конгрессы Башкарма комитеты җитәкчесе урынбасары Ирек Шәрипов, Ислам мәдәниятенә, фәненә һәм мәгарифенә ярдәм фонды директорының төбәк проектларын координацияләү һәм дәүләт структуралары белән хезмәттәшлек буенча урынбасары Алексей Петров, Ислам мәдәниятенә, фәненә һәм мәгарифенә ярдәм фонды директоры урынбасары, Болгар ислам академиясенең теология кафедрасы профессоры, фәлсәфә фәннәре докторы Али Вячеслав Полосин һ.б. катнашты. Пленар утырышны Татарстан Республикасы Мөфтие урынбасары, Ислам мәгарифе советы директоры, РИИ һәм КИУ ректоры, ТР Фәннәр Академиясенең хакыйкый әгъзасы (академик), сәясәт фәннәре докторы, профессор Рәфикъ хәзрәт Мөхәммәтшин алып барды.
Сәламләү сүзләре белән Мөфти Камил хәзрәт чыгыш ясады. Ул республикада яшь буынга белем-тәрбия бирүгә күп көч куйган имамнар эшчәнлегенең әһәмиятен әйтеп узды. Аның сүзләренчә, бу исә традицион рухи кыйммәтләрнең киләчәге барлыгын дәлилли.
-Ислам уку йортлары яшь мөселманнарның дини һәм милли, мәдәни һәм рухи тормышында зур роль башкара. Мәдрәсәләрдә нинди гыйльми һәм тормыш юнәлешләре бирелүенә карап, шәкертләр шуны үзеләренә сеңдерә. Шуңа күрә өммәтебезнең киләчәге, җәмгыятьтәге динара татулык күпмедер дәрәҗәдә мөгаллимнәрнең эшчәнлегеннән тора, – сөйләде ул.
Сәламләү сүзләре тәмамлангач, дини белем бирү оешмалары директорларын, ТР дәүләт хакимияте органнарын, дин һәм җәмәгать эшлеклеләрен, хәйриячеләрне Татарстанда мөселман мәгарифен үстерүгә керткән өлешләре өчен бүләкләделәр.
Автор фотолары
Язмага реакция белдерегез
Вход на сайт
Халыклар бердәмлеге көненә бәйле чаралар программасы
4 ноябрь көнне Россиякүләм халыклар бердәмлеге көне билгеләп үтелә. Әлегә датага бәйле чаралар программасын тәкъдим итәбез.
«Татарстан — безнең йортыбыз» Республика этномәдәни фестивале гала-концерты
4 ноябрь Муса Җәлил исемендәге татар академик дәүләт опера һәм балет театры сәхнәсендә «Наш дом — Татарстан» Республика этномәдәни фестивале гала-концерты узачак. Биредә республиканың 31 районыннан артистлар чыгыш ясаячак. Алар иҗади яктан Россиянең иң күп милләтле төбәкләренең берсен «Халыклар күп — Ватан бер!» шигаре астында тәкъдим итәчәкләр.
«Зур этнографик диктант»
1-8 ноябрь көннәрендә тугызынчы тапкыр Россиякүләм «Зур этнографик диктант» акциясе үткәреләчәк.
Акция традицион рәвештә онлайн һәм офлайн форматларда узачак.
Офлайн катнашучылар өчен 2 ноябрь Татарстан Халыклар дуслыгы йорты ишекләре ачык булачак. Онлайн-катнашучылар 1-8 ноябрьдә www.miretno.ru официаль сайтында сорауларга җавап бирә ала.
Беренче тапкыр диктант сорауларын төзүдә барлык теләк белдергән кеше катнашкан. Иң кызыклы һәм оригиналь сораулар диктантның дәүләт өлешенә кергән.
«Сәнгатьләр төне» акциясе
3-4 ноябрь көннәрендә республикада традицион рәвештә «Сәнгатьләр төне» акциясе узачак. Быел әлеге чара «Россия берләштерә» шигаре астында үтәчәк.
Музей-театрлар, күргәзмә һәм концерт заллары, китапханә һәм мәдәният йортлары офлайн һәм онлайн форматларда тематик чаралар уздырачак.
Гаилә елы кысаларында музейлар шулай ук гаилә программалары да әзерләгән.
Шулай ук әһәмияткә ия чара — 3 ноябрь ТР Милли музее фондларына Татарстанның чигелгән картасын тапшырачаклар.
Тулы программа учрежденияләр сайтлары, «Культура.РФ» һәм ТР мәдәният министрлыгы сайтында тәкъдим ителгән.
Фото: ТР мәдәният министрлыгы сайты
Следите за самым важным и интересным в Telegram-каналеТатмедиа
Яңалыклар битенә керегез
ТӘКЪДИМ ИТӘБЕЗ
Комментарийлар