Татарстан укучылары дистанцион укуга күчми

Бу хакта Татарстан буенча Роспотребнадзор идарәсе җитәкчесе Марина Патяшина белдерде.
«1 сентябрьдән бирле республика мәктәпләрендә мөгаллимнәр арасында коронавирус инфекциясен йоктырган 25 очрак, укучылар арасында 7 очрак ачыкланды. Араларыннан ике бала терелеп, парта артына әйләнеп кайтса, бишесе әлегә карантинда кала бирә. 400 укучы арасында бу кадәр генә авыручылар саны дистанцион укуга күчү өчен нигез була алмый», – дип белдерде ул.
Мәскәү укучыларының вакытыннан алдарак һәм озайтылган каникулга китүеннән соң, әти-әниләр арасында «Димәк, озакламый безгә дә килеп җитәр» дип шикләнүчеләрне дә тынычландыра дәүләт вәкиле. М.Патяшина сүзләренчә, дистанцион укуга күчү мәсьәләсе хакында, гомумән, сөйләшүләр алып барылганы юк. Республика мәктәпләрендә Covid-19 авыруын йоктыру очракларына оператив реакция булуның уңай нәтиҗәсе бу.