Төрекләр Фатих Кәрим шәхесен ача

Мәкаләдә Фатих Кәримнең тормыш юлы һәм иҗаты турында тәфсилле мәгълүмат бирелде. «Төркиядә Фатих Кәримне белмиләр, моның тышында журналист, язучы Фатих Кәрими белән бутыйлар, – ди автор Роза Корбан. –  Фатих Кәрими Төркиядә танылган язучы, аның әсәрләре төрек теленә дә тәрҗемә ителгән.  Фатих Кәрим исә ачылмаган материк кебек үзенең тикшеренүчеләрен көтә. Фатих Кәримнең күпкырлы иҗатын төрек укучыларга таныту өчен бу язма бер башлангыч булыр. Балачактан «Гармунчы аю белән җырчы маймыл» шигырен тыңлап үскән бер бала буларак Фатих Кәримнең балалар әдәбиятын да яшь буынга таныту бик мөһим.  

Танылган шагыйрь Илдар Юзеев «Озын гомерле шагыйрь» дигән мәкаләсендә Фатих Кәримнең шигырьләре турында: «Иң якын дустыңа сереңне сөйләгәндә дә, яшь наратка сөялеп сөйгәнеңне көткәндә дә, ярсып кыңгыраулы гармун уйнаганда да, тирән сагыну минутларында да Фатих Кәрим шигырьләрен искә төшерәсең», – дигән.  Ил язмышы, халык язмышы өчен янып-көеп гомер иткән шагыйрьнең гыйбрәтле тормыш юлы, тирән мәгънәле шигырьләре бүген дә безне уйландыра, моңландыра, елата һәм юата».

Фотолар "Төрки дөнья тарих мәдәният" журналыннан алынды