Яңа ел алдыннан «Мәгариф» журналы үз укучыларына үзгә бәйрәм ясады

«Яшел бишек–2022» һәм «ФДББС буенча иң яхшы дәрес» конкурсларына йомгак ясау конференциясен уздырды. Әлеге конкурс җиңүчеләре дистәгә якын мәртәбәле кунаклар – экспертлар чыгышын тыңлады. Алар арасында күпләргә таныш – бар гомерен мөгаллимлек эшенә, шәһәр балаларына үз туган телебездә математика фәненнән белем бирүгә багышлаган, шуның өстенә 27 ел буена Казандагы Шиһабетдин Мәрҗани исемендәге 2 нче татар гимназиясе директоры булып торган, кыскасы, укыту-тәрбия эшчәнлегенең бар нюансларын да биш бармагыдай белгән мөхтәрәм затыбыз да бар иде. Ул – Татарстанның халык укытучысы Камәрия Зиннур кызы Хәмидуллина. Тәҗрибәле педагог һәм остаз буларак, бүгенгедәй заманда татарның милли рухлы мөгаллиме булырга мөмкинме һәм моның өчен нишләргә? Үз чыгышында ул әлеге сорауга ачыклык кертергә тырышты.