Нурлат районында чуаш балалары татар телен бездән яхшырак белә!

"Гаилә һәм мәктәп" журналы редакциясе хезмәткәрләре бүген Нурлат районында кунакта булып кайтты. Район Мәгариф идарәсе җитәкчесе Линар Маняпов республика мәктәп һәм бакчаларында тәрбия һәм белем алучы балаларның ана телләрен өйрәнү өчен мөмкинлекләре булуга сөенә. Үз телен камил белгән бала башкасын да теләп өйрәнә. Нурлатта чуаш мәктәпләренең уңышлы эшләп килүе дә моның ачык мисалы.
Шулай ук, бу фикерне раслап,  шәһәрнең "Алсу" балалар бакчасына йөрүче балалар белән дә таныштык. Чуаш, әрмән,  рус телле гаиләләрдән килгән балалар биредә татарча сөйләшә икән. Куанычлы хәл!

Бакчада тәрбия эшенә әти-әниләр дә җәлеп ителә. Без килгәндә балалар көз күчтәнәче - кабак белән таныша иде. Әниләр һәм бәбиләр бергә әзерләгән бәлештән без дә авыз иттек.