Казан мэры «Игелек ярминкәсе»ндә катнашырга чакыра

 Бүген Казан мәктәпләрендә «Игелек атнасы» башланды – укучыларны танып белү чаралары, мавыктыргыч уеннар һәм акцияләр көтә. Атналык 11-нче сентябрьдә узачак «Игелек ярминкәсе» белән тәмамланачак. Казан Мэры Илсур Метшин эшлекле дүшәмбедә укучыларны һәм аларның әти-әниләрен ярминкәдә актив катнашырга чакырды.
Мәктәп «Игелек ярминкәсе»н үткәрү традициясен укучылар үзләре башлап җибәрде. «10 ел элек 19-нчы номерлы мәктәптә балалар «Игелек ярминкәсе» оештырды, идеяне укытучылар һәм директор хуплады. Аннары күрше мәктәпләр кушылды. Һәм бүген мондый ярминкәләр үткәрү традициягә әйләнде», – диде Илсур Метшин. Шәһәр башлыгы мәктәп укучыларының ата-аналарын акциядә катнашырга һәм үз балаларына кул эшләнмәләре ясарга ярдәм итәргә чакырды. «Без, мәктәп укучыларының ата-аналары, балаларга акциядә актив катнашырга ярдәм итәргә тиеш: киңәш бирергә, нәрсә дә булса бергә эшләргә», – дип билгеләп үтте ул.
«Игелек атнасы» Казан мәктәпләрендә «Өмет старты» чарасыннан башлана. Уку йортларында сыйныф сәгатьләре, ата-аналар җыелышлары, экскурсияләр һәм уртак чаралар узачак, дип сөйләде мәгариф идарәсе җитәкчесе Ирек Ризванов.

Сишәмбе, 7-нче сентябрь, хайваннарга ярдәм итүгә багышланачак. Балалар аларга карата җаваплы мөнәсәбәт турында белә, шулай ук «Без кулга ияләштергәннәр өчен җаваплы» программасында катнашачак. «Аның асылы җәмгыятьтә сукбай һәм йорт хайваннарына карата гуманлы һәм җаваплы караш формалаштырудан гыйбарәт», – дип сөйләде Ирек Ризванов. Программа бурычлары арасында – яшь казанлыларны хайваннарга карата дөрес мөнәсәбәт, приютлардан эт һәм мәчеләрне алу мөмкинлеге турында, хайваннарга волонтерлык ярдәме төрләре һәм хайваннар приютларына ярдәм итү ысуллары турында мәгълүмат бирү.
Казан Мэры ассызыклаганча, бүген хайваннарга җаваплы мөнәсәбәт темасы актуаль. «Быел без яңа зур максатка таба хәрәкәт итә башладык – хуҗасыз хайваннар проблемасына. Һәм бу максатка без уртак тырышлык белән ирешербез. Моның өчен еллар кирәк булачак, әмма без бергәләп барысын да булдыра алабыз һәм Казанны сукбай хайваннарсыз шәһәр итәчәкбез», – диде Илсур Метшин.
Атна уртасында «Дуслык көне» булачак – чәршәмбе көнне мәктәпләрдә бер-береңә толерант мөнәсәбәт формалаштыруга юнәлтелгән чаралар узачак. Бу – инвалидлар, мөмкинлекләре чикле балалар, төрле этник төркемнәр һәм милләт вәкилләре катнашында әңгәмәләр, уеннар булачак.
9-нчы сентябрьдә башлангыч мәктәптә игелекле эш эгидасы астында «Игелекле эш» көне узачак. Бу пәнҗешәмбе көнне балалар өчен өлкән яшьтәге кешеләргә, инвалидларга, аз тәэмин ителгән кешеләргә, социаль куркыныч хәлдә булган кешеләргә ярдәм итүгә юнәлдерелгән чаралар үткәреләчәк.
Җомга балаларны
экологик тәрбияләүгә багышланачак. «Саф һава» көне белем бирү учреждениеләре территорияләрен төзекләндерү һәм җыештыру, әйләнә-тирә мохитне
саклауга багышланган акцияләр һәм экологик дәресләр үткәрүне үз эченә ала», – дип сөйләде
Ирек Ризванов. Ул 1-нче сентябрьдән башлангыч мәктәп укучыларының
«Игелекле эшләр көндәлеге», «Яшь эколог көндәлеге» һәм «Мәктәп укучысының мәдәни көндәлеге» алуларын искәртте.
Алар белән алар «Игелек атнасы» дәвамында гына түгел, ә бөтен уку елы дәвамында эшләячәк.

Чыганак: Казан мэриясе