Мохтаҗларны сыйлыйк

Татарстан Диния нәзарәтенең «Зәкят» хәйрия фонды, узган еллардагыча, Корбан гаете алдыннан, «Мохтаҗларны сыйла» дигән хәйрия чарасы үткәрә.
«Зәкят» хезмәткәрләре кыен хәлдә калганнарга, очын-очка ялгап яшәүчеләргә, күп балалы, ярлы гаиләләргә ярдәм күрсәтү, бәйрәм көнендә өммәттәшләребезне сөендерү, гает шатлыгын уртаклашу максатында, мохтаҗларны сыйлау чарасына кушылырга чакыра. Моның өчен «Зәкят» хәйрия фондына, 225-33-22 телефонына шылтыратып, корбанлык мал сатып алу өчен ни рәвешле акча күчерү ысулын сорарга яки китереп бирергә кирәк.


Фонд хезмәткәрләре ун мең сум акча китереп биргән яисә  күчергән сурәттә сарык асраучы кешеләрдән корбанлык малны алып кайтуны, шартына китереп чалдыруны һәм мохтаҗ кешеләргә таратуны оештырачак.

Рәшит МИНҺАҖ