«Авыл укытучысы–2017» бәйгесе дәвам итә

11 мая 2017 Мәгариф

«Мәгариф» журналы редакциясе үз эшчәнлеген авыл җирлегендә алып бара торган мәктәпкәчә, башлангыч, төп һәм урта гомуми белем бирү оешмалары хезмәткәрләрендә иҗадилык, алдынгы инновацияләргә омтылыш тәрбияләү, уку-укытуда нәтиҗәлелекне арттыру, авыл мөгаллимнәренең һөнәри даирәдә абруен күтәрү максаты белән «Авыл укытучысы–2017» бәйгесе игълан иткән иде.

Конкурска Татарстан һәм Россия регионнарының район үзәкләрендә, шәһәр тибындагы бистәләрдә, бистәләрдә, авылларда эшләүче мәктәпкәчә, башлангыч, төп һәм урта гомуми, өстәмә һөнәри белем бирү оешмаларының педагогик хезмәткәрләреннән 50 гә якын эш килде. Катнашучыларның иҗади фикерләү осталыгын, методик һәм практик күнекмәләргә ия булу дәрәҗәсен, педагогик тәҗрибәсен мөмкин кадәр тулырак ачыклау максатыннан, конкурс 3 этапта уздырыла. I этапта катнашучылар 2017 елның 1 нче мартыннан 30 нчы июненә кадәр редакция тәкъдим иткән 4 теманың берсенә эссе язып җибәрергә тиеш.

Темалар:

1.«WORLDSKILLS –2019: булачак чемпионнар бездә тәрбияләнә».
2.«Милләт киләчәге – лидер яшьләр кулында».
3.«Укытучы һөнәре – яшәү рәвешем».
4.«Әхлак тәрбиясе–көн таләбе».
«Авыл укытучысы–2017» бәйгесе турында өстәмә мәгълүмат белән «Мәгариф» журналы редакциясендә (Казан ш., Декабристлар ур., 2), magarif-uku.ru сайтында танышырга була.
Бәйгенең нигезләмәсе