Болгарда рыцарьлар сугышачак

Бер генә көнгә урта гасырларга “кайтып” сөңгеләр очканын, кылычлар сынганчы Алтын Урда сугышчыларының (рыцарьлар) сугышканын, атларның кешни-кешни ихтыярсыздан егылганын күрәсегез киләме? Килсә, Болгар дәүләт тарихи-архитектура музей тыюлыгына барыгыз. Анда 2016 елның 13–14 августында   “Бөек Болгар” дигән Бөтенроссия “Урта гасыр сугышы"  фестивале узачак.

Быелгы фестивальгә Россиянең төрле төбәкләреннән 35 мең кеше килер дип көтелә. Казаннан барырга теләүчеләр үзәк автовокзалдан (“Столичный”) алдан ук билетлар алып куя алалар. Бу хакта “Татар-информ” агентлыгында журналистлар белән очрашуда катнашкан Татарстанның туризм буенча дәүләт комитеты рәисе Сергей Иванов һәм «Сулица» коммерцияле булмаган оешмасы башкарма директоры, фестивальне оештыручы Алексей Кокуриннар сөйләде.