Рөстәм Миңнеханов 1973 елгы студент билетын күрсәтте

Татарстан Президенты Рөстәм Миңнеханов бүген республиканың барлык студентларын һөнәри бәйрәмнәре (икенче төрле Татьяна көне дип тә атыйлар) белән котлап, “Вконтакте”да үзенең 1973 елгы студент билетын күрсәтте.

“Бүген – студент, иртәгә – Президент! Бәйрәмегез котлы булсын, укуыгызда уңышлар!” – дип язып куйган республика башлыгы социаль челтәрдә.

Сүз уңаеннан, Рөстәм Миңнехановның ике югары белеме бар. 1978 елда ул республиканың авыл хуҗалыгы институтын тәмамлый, 1986 елда Мәскәү совет сәүдәсе институтының Казандагы филиалында укып чыга.