Татарстанның 708 укытучысы грант алачак

Татарстанда гомумбелем мәктәпләренең 708 педагогы профессиональ үсешкә ярдәм өчен грант алачак. Бу хакта Татарстан Мәгариф һәм фән министрлыгы матбугат хезмәтеннән хәбәр иттеләр.

Бәйгедә «Өлкән укытучы» номинациясендә 200е уңышлы узды. «Укытучы-оста» юнәлеше буенча - 250, «Укытучы-остаз»да -150 һәм «Укытучы- эксперт»та 108 педагог җиңү яулады.

Профессиональ үсешкә ярдәм өчен грант алуга бәйге үткәрү боерыгы буенча, «Өлкән укытучы» номинациясендә җиңүгә ирешкәннәргә —4 000 сум,  «Укытучы-оста» номинациясендә иң яхшы нәтиҗә күрсәткәннәргә — 5 000 сум, «Укытучы-остаз» номинациясендә алдынгыларга — 8 000 сум,  «Укытучы- эксперт» номинациясендә грантка ия булган укытучыларга ай саен хезмәт хакыннан тыш 10 000 сум түләнәчәк.