Үсмер аутистны кыйнаган ир-ат ирегеннән мәхрүм ителде

31 января 2019 Мәгариф

Бүген Казанның Мәскәү районы суды үсмер аутистны кыйнаган 43 яшьлек Рөстәм Газизуллинны ике ел да өч айга ирегеннән мәхрүм итте.
Моннан тыш, рухи зыянны каплау өчен, зыян күрүченең әти-әнисенә 200 мең сум күләмендә акча да түләргә тиеш. Сүз уңаеннан, үсмернең гаиләсе әлеге сумманы 2 млн сум күләмендә таләп иткән иде.
Гаепләнүче Сидоровлар алдында моңарчы да, суд вакытында да гафу үтенмәде. Мәхкамә карары белән дә риза булмавын белдерде.
Искә төшереп үтәбез, узган елның сентябрь аенда Володя мәктәптән метрода өенә кайтканда кирәкле тукталышны узып китә һәм аның өчен бөтенләй таныш булмаган станциядә чыга. Үтеп баручыларга ярдәм сорап мөрәҗәгать итәргә дә өлгерми, аны кечкенә улын җитәкләп үтеп баручы ир-ат кыйный.
Укучыларыбыз хәтерли булыр, әлеге вакыйга хакында «Гаилә һәм мәктәп» журналының 11 нче санына язып чыккан идек.