“Миңа авыл укытучысы белем бирде...”
Резеда Наил кызы ФӘЙЗРАХМАНОВА,Актаныш районы Яңа Әлем төп мәктәбенең I квалификация категорияле рус теле һәм әдәбияты укытучысы. Эш стажы - 7 ел. ...Язгы табигатьне күзәтергә яратам. Тамчыларның, ихт...
Актаныш районы Яңа Әлем төп мәктәбенең I квалификация категорияле рус теле һәм әдәбияты укытучысы. Эш стажы - 7 ел.
...Язгы табигатьне күзәтергә яратам. Тамчыларның, ихтыярсыздан, кояшның бер карашыннан эрүенә исем китә. Агачларның яшеллек дөньясын хасил итеп, кошларны куандырулары – тагын бер могҗиза. Ихластан хозурланып, “хыял бишеге”ндә тирбәләм. Гүя бар җиһан уянып, яңа тормыш башлана. Бер тормыш икенчесен никтер кабатламый, һәркем язмышын үзенчә яза, үзенчә генә эзләр төшерә. Минем “гомер китабы”нда “Авыл укытучысы” дип язылган бик матур бизәк бар. Һәркемнең яшәү мизгелен ямьләндерүче булып гаиләсе торса, икенче урында хезмәте, сайлаган һөнәре бик кадерле була. Балачак хыялларына уралган һөнәрем – Укытучы булу миңа һәркөн шатлык китерә. Балаларның бер гаепсез карашлары, кызыклы сораулары, сәхнә түрендәге чыгышлары, фән өлкәсендәге казанышлары, шатлык тулы күз яшьләре, гаҗәеп елмаюлары мине бәхетле итә...
“Тормыш китабы”на бергәләп күз салыйк әле. Ямьле яз аенда нәни бер кызчык дөньяга килә. Әти-әнисе яратып, назга төреп, чәчәк исеме – Резеда дип исем кушалар. Булачак авыл укытучысының тәүге адымнары шулай башлана. Барлык иптәшләрем дә балалар бакчасына йөрсә, ә минем янәшәдә әбиемнәр булды. Алтын киңәшләрен биреп, хөрмәт, ихтирам кебек матур төшенчәләрне минем күңелдә өлкәннәр тәрбияләде.
Икенче бит. Кулларыма аллы-гөлле чәчәкләр тотып, мәктәпкә ашыгам. Мине гап-гади авыл укытучысы каршы ала да, белем иленә сәяхәткә дәшә. Беренче “5”леләр, тәүге хаталар, катлаулы мәсьәләләр бер-бер артлы тезеләләр. 11 ел дәвамында бик күпне өйрәткән, бик күпне төшендергән укытучыларым белән саубуллашу мизгелләре дә килеп җитә. Авылыбыз зур булганлыктан, бер класста 30 бала укыдык. 30 язмыш... 30 характер... 30 төрле фикер... 30 сораулы карашны үзенә карата алган бит авыл укытучысы! Ә аттестатны гел “5”ле билгеләре генә бизи. Менә кайда ул укытучының эш нәтиҗәсе.
“Студент” бите. Юллар мине Алабуга дәүләт педагогия университетының филология бүлегенә китерде. Үз фәнен яраткан мөгаллимнәр белән аралашу тагын да Укытучы һөнәренә якынайтты. Ниһаять, кулымда - кызыл диплом! Гап-гади авыл мәктәбе укучысы шәһәр студентларын узып китте. Яңа Әлем мәктәбе укытучылары төпле белем нигезе булдырганнары өчен мин бик тә рәхмәтле. Укытучы буларак эшкә юллама да туган ягыма – Актанышка булды.
“Гаилә” бите. Укытучының эше мәктәптә генә тәмамлана алмый, дәфтәрләр, китаплар өйгә “ияреп кайта”. 24 сәгать дәвамында башкарылган эш - иксез-чиксез дәрья. Тормыш иптәшем белән нәни улым – минем терәгем.
Яшь укытучы. Үзе белем алган авыл мәктәбендә хезмәт кую һәркемгә дә бирелмидер. “МИН – АВЫЛ УКЫТУЧЫСЫ!”. Әлеге серле сүзләрне “Тормыш китабы”ның бер битенә зур хәрефләр белән язып куйдым әле.
Бүген без яңа мәгълүмати технологияләр алга киткән заманда яшибез. Белем бирү системасы зур үзгәрешләр кичерә. Авыл укытучысына заман нинди шартлар куя соң? Яңа Әлем авылы мәктәбендә рус теле һәм әдәбияты укытучысы буларак 7 ел эшләү дәверендә, укучыларым күптөрле бәйгеләрдә катнаштылар, үзем дә район, республикакүләм конкурсларда җиңүләр яуладым. Ләкин бәйрәм-кичәләрне оештыру, дәрестә информацион технологияләрне куллану, укучыларны бәйгеләргә әзерләүдә кыенлыклар белән очрашабыз. Авыл мәктәбендә компьютер классы да бер генә, проекторлар саны да бик аз, тавыш яздыру, музыка көйләү мәсьәләләрен дә оештыру авыр бирелә. Шәһәр мәктәпләре өчен мөмкинлекләр зуррак дип саныйм. Ләкин...
Авылның саф һавасын, урам тулы балалар шавын берни дә алыштыра алмый. Заман авыл укытучысы менә шуның белән ота да инде. Балачакта һәркемнең тормышына килеп кереп, озак еллар буена аның белән бергә булып, үзенең йөрәгендә аңа да урын табып, кирәк вакытта ярдәм итеп, белемле иткән кеше кем ул? Әлбәттә, ул – авыл укытучысы!
Язмага реакция белдерегез
Вход на сайт
Мин бәхетле!
Сәрия Фәрдетдиновна ХӘСӘНОВА,Мөслим районы Исәнсеф башлангыч мәктәбенең башлангыч класслар укытучысы. Эш стажы – 24 ел.Бәхетне һәрбер кеше үзенчә аңлый. Кем өчендер бәхет сүзе байлык сүзе белән синони...
Мөслим районы Исәнсеф башлангыч мәктәбенең башлангыч класслар укытучысы. Эш стажы – 24 ел.
Бәхетне һәрбер кеше үзенчә аңлый. Кем өчендер бәхет сүзе байлык сүзе белән синоним, авыруга-сәламәтлек сүзе белән, талчыкканга- ял сүзе белән. Бик күпләргә бәхетле булу өчен минем шигьри юлларда саналган сыйфатлар кирәктер дип уйлыйм. Сине аңлый торган, һәрвакытта да ярдәм кулы сузарлык, ныклы терәк булырлык гаиләң булуы чыннан да олы бәхет. Гаиләдә мәхәббәтнең җимешләре булып туган балаларның сәламәтлеге дә зур бәхет. Яраткан эшең булу да һичшиксез бәхетнең нәкъ үзе инде...
Мин – башлангыч класслар укытучысы. Кулымда – яңа гына тормыш юлына аяк баскан сабыйларның язмышы. Мин укучыларымны чиста, ап-ак кәгазь битенә тиңлим. Ул кәгазь битенә ни язылуга карап сабыйның тормышы үзгәрергә мөмкин. Укучылар бар яклап та беренче укытучыларын кабатларга тырышалар. Күп кенә укучыларда, киләчәктә беренче укытучыларына хас булган сыйфатларны күрергә мөмкин. Шуңа күрә дә башлангыч класслар укытучысы бик нык җаваплы эш. Башлангыч класслар укытучысы артист та була, рәссам да, спортсмен да, галим дә, психолог да... Укытучының һөнәрләрен санап кына да бетереп булмый.
Укытучының төп бурычларыннан берсе итеп мин теләге булмаган балада теләк уятуда күрәм. Кечкенә дусларымның шәхескә әйләнүләрендә үземнең бик зур роль уйнаганымны яхшы аңлыйм, һәм моңа бик җаваплы карыйм. Укучылырымның нинди һөнәр сайлаулары мөһим түгел: ташчымы ул, әллә табибмы; сәхнә эшчесеме әллә илбашымы... Миңа баланың социумда үз урынын табуы мөһим. Баланың мәктәптәге тормышының, киләчәк тормышының нинди булуында беренче укытучы бик мөһим роль уйный бит.
Минем дә авырган чакларым да, арыган чакларым да була. Шул чакларда: мине мәктәпкә ни бәйләп тота икән соң, дип уйлыйм. Әлбәттә мине мәктәпкә, күзләре зур кызыксынудан янып торган укучыларым бәйләп куйганнар. Аларны бик яратам, ә алар миңа икеләтә ярату белән җавап бирәләр. Мин һәрвакытта да балага шәхес итеп, үзем белән тиң, ачышлар ачарга сәләтле кеше итеп карыйм. Бала үз фикерен әйтә белергә тиеш. Фикерне дөрес юлга этәрү укытучының осталыгыннан тора. Мин һәрвакытта да баланы үз тәҗрибәсе булган, дөньяга үз карашлары булган шәхес буларак кабул итәм.
Төп бурычларымнан берсе булып укучыларымның замана белән бергә атлауларына ирешү тора. Авылда яшәсәк тә, шәһәр балаларыннан ким белем алырга тиеш түгел алар. Укытучы белемле, көн кадагындагы технологияләрне бик яхшы белә икән, авыл балалары да тиешле белем һәм тәрбияне алачаклар. Без авылда яшибез шул, безнең мөмкинлекләребез шәһәрнекеннән кимерәк инде, дигән аклануны мин гел кабул итмим. Укытучы үзе тырыш, замана укытучысы булса, укучылары да бүгенге көн таләбенә җавап бирерлек укучылар булачаклар. Минем укучыларым өч телдә: татар, рус, инглиз телендә аңлаша ала, чөнки мин үзем теләп инглиз теле укытучысы һөнәрен дә үзләштердем.
Без укучыларым белән федераль, региональ, муниципаль конкурсларда, олимпиадаларда конференцияләрдә катнашабыз, фәнни-эзләнү эшләре алып барабыз. Иң соңгы фәнни-эзләнү эшебез авылыбызның күрке булган "Кенәз" күленең ни өчен кибүен ачыклау булды, ничек итеп эклологик хәләкәтне булдырмый калып булганлыгын тикшердек. Нәтиҗәсе белән авылыбыз җыенында чыгыш ясадык. Авылыбызның халкы да безне кечкенә дип тормадылар, сүзебезгә колак салдылар. Күлгә авылыбыз белән ярдәм күрсәттек, хәзер зур өметләр белән, күлебезнең саф су белән тулуын көтәбез.
Укучылар минем җаныма, тәнемә шифалы чишмә суы кебек тәэсир итәләр. Шуңа да минем картаерга да, авырырга да хакым юк. Минем дәвам минем белән гел янәшә бит. Мин бәхетле, чөнки иртәгә янә укучыларым янына барачакмын!
Следите за самым важным и интересным в Telegram-каналеТатмедиа
Яңалыклар битенә керегез
ТӘКЪДИМ ИТӘБЕЗ
Комментарийлар