Grandma Universe 2018 Халыкара матурлык конкурсы җиңүчесе Илия Гарипова кичә Казанда җанатарлар фестивале мини-кырына футбол уйнарга туй күлмәгендә чыкты, дип хәбәр итә «Татар-информ» агентлыгы.
«Мин мондый чараларда катнашырга яратам. Ирем дә футбол уйный, әлбәттә, элек мин дә футбол уйный идем, әмма туй күлмәгендә беренче тапкыр», — дип сөйләде дөньядагы иң матур әби.
Кәләшләр матчы җанатарлар фестивале мәйданында узды.
Илия Гарипова Болгария халыкара конкурсында Россия данын яклаган. Жюри Казанда яшәүче 45 яшьлек ханымны галәмдәге иң матур әби дип таныган. Аның өч баласы һәм кечкенә оныгы бар.
