Татарстанда Социаль фонд бүлеге 2024 елда арткан түләүләрне алучылар турында сөйләде
Пособие күләме һәр төбәктә балага яки эшкә сәләтле өлкәннәргә билгеләнгән яшәү минимумыннан чыгып билгеләнә.
Россия Социаль фонды Татарстанда яшәүчеләргә бирелә торган түләүләрнең күпчелеген 2024 елның гыйнварында индексацияләгән. Бу хакта бүген Россия Социаль фондының Татарстан буенча матбугат хезмәте хәбәр итә.
«Гыйнвардан эшләмәүче татарстанлыларның иминият пенсияләре, шулай ук бердәм пособие, балаларга түләүләр һәм ана капиталы күләме артты. Бу төбәктә яшәүче миллионлаган кешегә кагыла», – дип билгеләп үттеләр ведомствоның матбугат хезмәтендә.
Эшләмәүче татарстанлыларның иминият пенсияләре элек планлаштырылган 4,6 процент урынына 7,5 процентка артты. Индексация картлык буенча пенсия алучы 900 меңнән артык кешегә кагылды. Моннан тыш, гыйнварда күп кенә пособиеләр күләменә йогынты ясаучы яшәү минимумы күләме артты. Шулай итеп, 200 меңнән артык бала, шулай ук 2 меңнән артык көмәнле хатын-кыз ала торган бердәм пособие күләме арттырылды.
Пособие күләме һәр төбәктә балага яки эшкә сәләтле өлкәннәргә билгеләнгән яшәү минимумыннан чыгып билгеләнә. Татарстанда балага яшәү минимумы 12,7 мең сум тәшкил итә, ә эшкә сәләтле өлкәннәргә – 14,3 мең сум.
Яңа елда Татарстанда балаларга бердәм пособие 6 меңнән 12,7 мең сумга кадәр тәшкил итә һәм балага яшәү минимумының 50, 75, 100 проценты түләнә.
Балаларга башка түләүләрнең күләме дә арткан. Мисал өчен, өч яшькә кадәрге беренче балага айлык пособие яки өч яшькә кадәрге балаларга ана капиталыннан айлык түләү. Бүгенге көндә төбәктән 20 мең бала шундый дәүләт ярдәмен ала.
«Татар-информ»га Россия Социаль фондының Татарстан буенча матбугат хезмәтендә хәбәр итүләренчә, быел пенсионерлар өчен җирләү пособиеләре артачак. «Пенсионерлар өчен җирләү пособиеләре февральдән артачак һәм 8,3 мең сумнан артык тәшкил итәчәк», – дип билгеләп үттеләр фондта.
Моннан тыш, 1 февральдән ана капиталы 7,4 процентка индексацияләнә. Әгәр дә гаиләләр аны элегрәк кулланмаган яки өлешчә тотмаган булса, сертификат суммасы билгеләнгән процентка күбрәк булачак. Беренче балага дәүләт ярдәме күләме 630,4 мең сум тәшкил итәчәк, ә икенчесенә – 833 мең.
Чыганак: "Татар-информ"
Язмага реакция белдерегез
Вход на сайт
Кариев театрында премьера – «Ханума»
Грузин драматургы Авксентий Цагарели пьесасы Илдус Әхмәтҗанов тәрҗемәсендә куелачак.
Кариев театры Татарстанның атказанган артисты Лилия Низамиеваның 50 яшьлек юбилее уңаеннан «Ханума» музыкаль комедиясен тәкъдим итә. Спектакльнең режиссеры – Ренат Әюпов.
Грузин драматургы Авксентий Цагарели пьесасы Илдус Әхмәтҗанов тәрҗемәсендә куелачак.
Ренат Әюпов әйтүенчә, «Ханума» музыкаль комедиясендә Гия Канчелиның 12 грузин җыр партиясе яңгыраячак.
«Ханума» – Лилия Низамиеваның күптәнге хыялы икән. Юбилее уңаеннан нәкъ менә шушы әсәрне кую идеясен режиссерга ул үзе тәкъдим иткән. «Миннән: «Ни өчен Ханума образы?» – дип сораучылар булды. Дөресен генә әйткәндә, мин үземне тормышта Ханума кебек хис итәм. Холкым, кайбер сыйфатларым – нәкъ аныкы. Бу пьеса шулкадәр рәхәт һәм җиңел, аны ләззәт алып карарга гына кирәк», – ди Лилия ханым. Сүз уңаеннан, аның белән бергә спектакльдә ире – Татарстанның атказанган артисты Илнар Низамиев һәм улы – Кариев театры труппасына былтыр гына килеп кушылган Искәндәр Низамиев та уйный, дип хәбәр итә Кариев театрының матбугат үзәге.
Актерлар составында шулай ук Татарстанның халык артисты Илфат Камалиев, Татарстанның атказанган артистлары Әминә Галиева, Гөлнара Фазылҗанова, Гөлнара Абитова, Фәнис Кәлимуллин, Алия Кәлимуллина, Энҗе Камалиева, Гөлназ Галимуллина, Кариев театры артистлары Муса Камалов, Илназ Хәбибуллин, Рузанна Хәбибуллина, Камилә Шәңгәрәева бар. Спектакль ике составта уйналачак.
Кариев театры тамашачыларны 27 гыйнвар 18:00 сәгатьтә премьерага көтеп кала. Бу көнне Лилия Низамиева сәхнәдә котлаулар да кабул итәчәк.
Следите за самым важным и интересным в Telegram-каналеТатмедиа
Яңалыклар битенә керегез
ТӘКЪДИМ ИТӘБЕЗ
Комментарийлар