ТР Яшьләр эшләре министрлыгы яшьләр өчен яңа торак программасы әзерли

26 гыйнвар 2026 Мәгариф

Татарстан Республикасының Яшьләр эшләре министрлыгы яшьләргә шәхси торак төзелешендә ярдәм итүгә юнәлтелгән яңа торак программасы әзерли. Бу хакта «Татар-информ» хәбәр итә.

ТР яшьләр эшләре министры Азат Кадыров сүзләренә караганда, торак мәсьәләсе Татарстан яшьләре өчен иң актуаль проблемаларның берсе булып кала. Хәзерге вакытта республикада әлеге юнәлештә дүрт профильле программа гамәлгә ашырыла, шуларның берсе — федераль программа.

Аның әйтүенчә, яшь гаиләләр арасында шәхси йорт төзелешенә дәүләт ярдәме күрсәтү программаларына ихтыяҗ зур. Министрлык 2026 елда Татарстанда шундый программа булдыру инициативасы белән чыгарга ниятли.

Шулай ук, Азат Кадыров билгеләп үткәнчә, авыл җирендә яшәүче яшьләр өчен ислам ипотекасы механизмын гамәлгә кертү мөмкинлеге дә карала.

«Яшь белгечләр һәм галимнәр өчен дә ярдәм чаралары бар. Әмма шуңа да карамастан торакка ихтыяҗ һаман да югары булып кала», — дип ассызыклады министр.