Баласы булган хатын-кызларга түләнә торган өстәмә ял

28 января 2023 Мәгариф

РИА Новости агентлыгы хәбәр итүенчә, Россия Бәйсез профсоюзлар федерациясе рәисе урынбасары Александр Шершуков, баласы булган хатын-кызларның түләнә торган өстәмә ял алырга яки уртача хезмәт хакын саклаган хәлдә тулы булмаган эш вакыты сорарга хакы бар, дип саный. Бу сүзләрне ул «Яңа кешеләр» партиясенең хатын-кызлар мәнфәгатендә хезмәт турындагы законнарны камилләштерү мәсьәләләренә багышланган түгәрәк өстәл утырышында әйткән.

Ул шулай ук балалар бакчалары һәм мәктәпләр эш режимының әниләрнең эш режимына туры килмәвенә дә игътибар юнәлтте. Шершуков фикеренчә, хезмәт турындагы законнарга мәктәпкәчә һәм кече мәктәп яшендәге балалар тәрбияләүче хатын-кызлар һәм ир-атлар өчен эш вакытында уңайлы режим кертү ихтималын да карарга мөмкин.

Фәния Лотфуллина