Тәбрис Яруллин вазифасыннан китә

Тәбрис Яруллин Бөтендөнья татар конгрессы Башкарма комитеты җитәкчесенең татар яшьләре иҗтимагый оешмалары белән эшләү буенча урынбасары һәм Бөтендөнья татар яшьләр форумы рәислеге вазифаларыннан үз теләге белән китүен белдерде. Бу хакта конгрессның матбугат хезмәте хәбәр итә. 
“Әлеге адымны мин җентекләп уйлап эшләдем. Күпләр өчен бу адым көтелмәгән булса да,  мин аны алдан ук шулай планлаштырган идем. Минем өчен яңа мөмкинлекләр ачылды, шуңа күрә татар яшьләре, җәмәгатьчелек бу адымны дөрес аңлар дип уйлыйм.  Хәл иттем, кабаттан  конгресска,  җитәкләгән урыннарга кайту теләгем юк»,— дип үз фикерләрен белдергән Тәбрис Яруллин.
«Татар яшьләре  башлаган проектлар күп, бүгенге көндә аларны дәвам итәргә безнең буын әзер,  яшьләргә юл бирик. Иҗтимагый эшчәнлек күп көч, вакыт сорый, шуңа күрә мин игътибарны күбрәк гаиләмә дә бүләсем һәм үз эшемне булдырасым килә», –  дип аңлаткан ул.