27 сентябрьдә Биектауда «Авыл укытучысы – 2024» бәйгесенең финалы узды

Быел әлеге конкурста республикабыз районнарыннан 100 гә якын конкурсант катнашты. Беренче этапта педагоглар һәм тәрбиячеләр иҗади эш юлласа, икенче этапка сайлап алынган 30 мөгаллим һәм тәрбияче дәрес яки дәрестән тыш чара белән көч сынашты. Йомгаклау турына 8 укытучы, бер укытучы-логопед һәм 3 тәрбияче катнаша. Конкурсны үткәрүнең максаты  Татарстан районнарында югары һөнәри осталыкка ия булган укытучыларны ачыклау, авыл мөгаллимнәренең абруен күтәрү, үзара һөнәри тәҗрибә уртаклашу, дип билгеләп үттеләр бәйгене оештыручылар.

Конкурста катнашкан  Балтач гимназиясенең рус теле һәм әдәбияты укытучысы Венера Әмир кызы Мостафина, Арча районы Сеҗе мәктәбенең сәнгать укытучысы Нурзилә Минһаҗева, Буа районы Кыят урта мәктәбенең татар теле һәм әдәбияты укытучысы Гөлия Низамова, Кайбыч районы Бәрлебаш төп мәктәбенең география укытучысы Эльмира Рәхмәтуллина, Тукай районы Мәләкәс урта мәктәбенең музыка укытучысы Эльвина  Сәмигуллина, Актаныш районы Сәләтле балалар өчен гимназия-интернатның инглиз теле укытучысы Румия Темел, Лаеш районы Имәнкискә урта мәктәбенең математика укытучысы Лилия  Шакирова, Питрәч районы Кощак урта мәктәбенең тарих укытучысы Екатерина Цыкина;  Биектау районы Ямаширмә авылы балалар бакчасы тәрбиячесе Энҗе Гыйләҗева, Әлки районы Базарлы Матак авылы балалар бакчасы укытучы-логопеды Наталья  Коновалова, Әгерҗедәге 7 нче балалар бакчасы тәрбиячесе Миләүшә Нургалиева, Апас районы Борнаш авылы бакчасы тәрбиячесе Алсу Шәйхетдинова йомгаклау турына уңышлы үтте. 

       «Авыл укытучысы – 2024» бәйгесенең абсолют җиңүчесенә 50 мең  сум, II урынга – 30 мең, III урынга 20 мең сум күләмендә, шулай ук 5 номинациядә 10 ар мең сумлык кызыксындыру премиясе бирү вәгъдә ителде.  Рус һәм татар төркемендә эшләүче тәрбиячеләр «Иң яхшы тәрбияче – 2024» махсус номинациясе буенча билгеләп үтеләчәк. Бүләкләрне ТР мәгариф һәм фән министры Илсур Һадиуллин «Авыл укытучысы – 2024» бәйгесендә җиңүчеләр белән традицион очрашу вакытында тапшырачак.

Шунысын да әйтик: «Авыл укытучысы – 2024» бәйгесендә катнашучыларның эшләрен ТР Мәгарифне үстерү институтының татар теле һәм әдәбияты кафедрасы мөдире, филология фәннәре кандидаты,  Татарстанның халык укытучысы, Россия Федерациясе Югары мәктәбенең мактаулы хезмәткәре, Каюм Насыйри исемендәге премия лауреаты Рәсимә Шәмсетдинова җитәкчелегендәге мәртәбәле жюри бәяләде. Танылган мөгаллимә үзе дә  Ямаширмә урта мәктәбендә белем алган.

                                        Автор фотолары