«Телсез күке» фильмы Казанда күрсәтелә

Фильм Казан халыкара «Алтын мөнбәр» кинофестивалендә Милли конкурста катнашып «Кино сәнгатендә гуманизм өчен» махсус бүләк алган иде.

«Телсез күке» «Яңа татар пьесасы» конкурсында җиңгән Зөлфәт Хәким әсәре буенча эшләнгән. Сценарийның автордашы Сергей Свденбург-Свинцов. Бу сугыш вакытында мәхәббәт, хыянәт һәм 1939-1940 еллардагы совет-фин сугышы вакыйгалары фонында туганлык тарихы.

Язучы З.Хәким фильмда рольләрнең берсен дә башкарды. Җырчы Сәидә Мөхәммәтҗанованың эшен дә зур кинода дебют дип санарга мөмкин. Гәрчә элегрәк ул кинофильмнарда бер-ике эпизодик рольдә, мәсәлән, «Без-41 нче ел балалары»нда күренгән булса да.

Шулай ук рольләрдә Г.Кариев театры артистлары - Илсаф Нәҗипов һәм Эльдар Гатауллинны да күрергә мөмкин. 27 февральдә «Телсез күке»не иҗат итүчеләр белән шәхсән аралашу мөмкинлеге дә булачак.

Казанның «Мир» кинотеатрында 27 февраль көнне фильмны  18:00 дә карарга мөмкин булачак.

Фото: Татаркино матбугат хезмәте