Тинчурин театрында Тинчурин турында спектакль

 – Театрыбыз Кәрим Тинчурин исемен йөртә икән, бездә аның турында спектакль репертуарда булырга тиеш. Яңа спектакль туган бала кебек: аны бик теләп көтәбез. Һәр  әсәр белән яңа тамашачы, яңа эмоцияләр һәм яңа фикерләр дә килә, – дип билгеләп үтте К.Тинчурин исемендәге татар дәүләт драма һәм комедия театры директоры Фәнис Мөсәгыйтов.

«Хыялга бер адым» пьесасын прозаик, Татарстанның атказанган сәнгать эшлеклесе Рөстәм Галиуллин тарафыннан Кәрим Тинчуринның хатыны, «Сәйяр» труппасы актрисасы Заһидә Тинчурина истәлекләренә нигезләнеп, Тинчурин театры өчен махсус иҗат ителгән. Актриса истәлекләрен Татарстанның халык язучысы Рабит Батулла туплап, «Җимерелгән бәхет» әсәрендә тасвирлаган.

Театр баш режиссеры Туфан Имаметдинов фикеренчә, куелышның үзенчәлеге түбәндәгедә:

 – Постановка татар театрының чишмә башын тасвирлый. Моны Тинчурин актерлары Кәрим Тинчурин исемен йөрткән театр сәхнәсендә күрсәтә. Спектакльнең үзенчәлеге дә шунда, – диде ул.

Фото: театр матбугат хезмәте