«Демография» милли проекты ярдәмендә Татарстан балалар бакчаларында 15,7 мең урын булдырылган

07 декабря 2024 Әдилә БОРҺАНОВА

Моннан тыш, әлеге проект ярдәмендә республикада 67 балалар бакчасы төзү, гамәлдәге 75 мәктәпкәчә белем бирү учреждениесендә төркемнәрне яңадан профильләү нәтиҗәсендә 3 яшькә кадәр 8 790 балага урын булдырылган. Бу хакта түгәрәк өстәл утырышында Татарстан мәгариф һәм фән министры Илсур Һадиуллин хәбәр итте.

Министр әйтүенчә, 2019–2024 елларда «Мәгариф» милли проекты кысаларында узучы чараларга 26 миллиард сум бүлеп бирелгән.

«Гомуми белем бирү даирәсендә сыйфатлы белем бирү — төп бурычыбыз. Республика мәктәпләрен тәмамлаучылар барлык фәннәрдән дә югары нәтиҗәгә ирешүләре белән аерылып тора. 2024 елгы БДИ нәтиҗәләре буенча, 366 укучы имтиханнарда йөз балл җыйган, алар арасыннан 20 бала берьюлы ике фәннән шундый ук югары балл алуга ирешкән. 244 мәктәп укучысы Бөтенроссия олимпиадаларында җиңүче һәм призер исемен алган», ‒ дип билгеләп үтте Илсур Һадиуллин.

Министрлыктан алынган мәгълүматларга караганда, республикада кадрларны үстерү буенча куәтле эш бара. Бүгенге көндә хезмәт базарында көндәшлеккә сәләтле эшче кадрларны әзерли торган 49 үзәк, 14 укыту-җитештерү һәм белем бирү кластерлары эшләп килә.

«Профессионалитет» федераль проектында 16 Татарстан оешмасы җиңү яулаган. 11 оешма нигезендә мәгариф-җитештерү кластерлары эшләп килә, аларда эре оешмалар өчен махсус кадрлар әзерлиләр. Ел саен Татарстанның җыелма командасы һөнәри осталык буенча «Профессионаллар» һәм «Абилимпикс» милли чемпионатларында алдынгы урыннар яулый. 2023 ел нәтиҗәләре буенча Татарстан регионнарның фәнни-технологик үсеше буенча Милли рейтингында 3 нче урынны алып тора.