«Катлаулы, әмма кызыклы эш»: Казанда яшь педагогларны һөнәргә багышладылар

Бүген Казанның «Адымнар» күптелле белем бирү комплексында яшь педагогларны укытучы һөнәренә багышлау тантанасы узды. Педагогик уку йортларын тәмамлаучыларга ТР мәгариф һәм фән министры Илсур Һадиуллин Татарстан Рәисе Рөстәм Миңнехановның теләкләрен җиткерде.

«Бүгенге көн мәктәбе алдында балаларга тирәнтен һәм иҗади фикерләү, үз идеяләрен гамәлгә ашыру күнекмәләрен бирү бурычы тора. Безнең укытучылар барлык тырышлыкны милләтпәрвәрлек, туган телгә мәхәббәт, мәдәнияткә, гореф-гадәтләргә ихтирам белән тыгыз бәйләнештә нәкъ менә шушы сыйфатларны тәрбияләүгә юнәлтергә тиеш. Сезгә – яшь белгечләргә – боларның барысы да аеруча аңлаешлы һәм якындыр, дип уйлыйм», – дип мөрәҗәгать итте ул.

Министр фикеренчә, бүген укытучылар җитмәү проблемасы кала бирә.

- Барлык яшь укытучылар да укуларын тәмамлаганнан соң мәктәпләргә эшкә килми. Вәзгыятьне үзгәртү өчен ныклы гамәлләр кирәк, шул исәптән федераль дәрәҗәдә дә. Алдыбызда яшь белгечләрне лаеклы хезмәт хакы, ташламалар, социаль түләүләр, торак белән тәэмин итү бурычы тора. Республикада яшь укытучылар өч ел дәвамында ай саен 2510 сум ала, шулай ук күп кенә районнарда төрле ташламалар каралган. Әйе, бу алай күп түгел, әмма вакыт узу белән вәзгыять үзгәрәчәк», – дип белдерде Һадиуллин.

Ул билгеләп үткәнчә, бу уку елында укытучыларга йөкләнешне киметү өчен чаралар санын 50% ка киметкәннәр.

- Без укытучыларның балалар белән күбрәк эшләвен телибез. Иң мөһиме-балаларны тәрбияләү, - диде министр.

Чарада мәгариф системасында эшләүче 300дән артык вәкил: педагогик югары уку йортларын һәм көллиятләрне тәмамлаган яшь укытучылар, профсоюз оешмалары, югары, һөнәри һәм өстәмә һөнәри белем бирү учреждениеләре остазлары катнашты.

Тантаналы чараның финал өлешендә сентябрьдан республика мәктәпләрендә эшкә керешүче яшь укытучылар ант итте. Тантана яшь педагогларның гимнын башкару белән тәмамланды.

Фото: mon.tatarstan.ru