Казанда җәлилчеләрне искә алалар

Музей урнашкан йорт – Муса Җәлилнең соңгы фатиры, шуннан ул фронтка китә. Ел саен 25 августта бу йортта 80 ел элек җәзалап үтерелгән 11 кешенең батырлыгына багышланган истәлекле вакыйга уза.

Чарада Муса Җәлилнең нәсел варислары – кызы Чулпан Җәлилова, оныгы Татьяна һәм оныкчыгы Елизавета Малышевалар, Абдулла Батталның туганнары, тарих фәннәре докторы, галим Искәндәр Гыйләҗев, Татарстан Республикасы Язучылар берлеге вәкилләре һәм башкалар катнашачак. Муса Җәлил һәм аның көрәштәшләренең якыннарына сугыш кырларында һәм немец төрмәләрендә язган хатларыннан өзекләр тәкъдим ителәчәк, шигырьләр яңгыраячак. Чара 10.00 сәгатьтә булачак.

12.00 сәгатьтә Муса Җәлил һәйкәле янында, 1 Май мәйданында гомумшәһәр митингы һәм чәчәк салу тантанасы башлана.
17.00 сәгатьтә Салих Сәйдәшев исемендәге Зур концерт залында Муса Җәлил исемендәге «Шагыйрь һәм музыка» III Халыкара музыкаль-шигъри фестивале җиңүчеләренең концерты була.

Бу көн Татарстан Республикасында гына истәлекле түгел. Германиядә, Мәскәүдә, Ырынбур өлкәсендә чәчәк салу тантанасы уза. Бу 1943 елның августында «Идел-Урал» легионында яшерен эшчәнлек алып барган өчен кулга алынган каһарманнарны искә алу. Моннан 80 ел элек, 25 августта, 12 сәгать 06 минуттан башлап, Өченче Рейх Империя судының 1944 елның февралендә булган карары нигезендә, Плетцензее төрмәсендә гильотинада фашистларга каршы пропаганда алып баруда һәм Германиянең хәрби куәтен какшатуда гаепләнгән 11 татардан торган төркем җәзалап үтерелгән. Аларның исемнәре: Гайнан Кормаш, Фуат Сәйфелмөлеков, Абдулла Алиш, Фуат Булатов, Муса Җәлил, Гариф Шабаев, Әхмәт Симаев, Абдулла Батталов, Зиннәт Хәсәнов, Әхәт Аднашев, Сәлим Бохаров.