Татарстан һәм Донбасс турында күргәзмә ачыла

«Татарстан – Донбасс: 100 ел тарих» күргәзмә проекты 15 августтан Милли музейның яңа филиалы – «Юстиция тарихы» музей-мәгариф үзәгендә оештырыла.

«Бу – Юстиция кварталы территориясендә Һади Такташ урамында урнашкан  яңа музей киңлеге. Ул –  Татарстан Милли музееның 15 нче филиалы. Тиздән биредә юстиция һәм гаделлек, хокук тәртибе төшенчәләрен ачучы даими экспозиция барлыкка киләчәк, – ди музей директорының үсеш буенча урынбасары вазифаларын башкаручы Анастасия Мокрополова. – Хәзер үзәкнең күргәзмәләр залында Татарстан белән Донбассның мәдәни һәм икътисади алмашу тарихын чагылдырган проект эшли башлаячак. Көз аенда анда лекцияләр һәм квизлар уздырачакбыз».

Күргәзмә нигезендә – ике төбәкнең киң мәдәни элемтәләрен чагылдырган төп документлар, фотографияләр һәм предметлар рәте. Татар мәдәнияте эшлеклеләре – Һади Такташ, Фәйзулла Туишев, Нәҗип Җиһанов архивларында Донбасста татар диаспорасы формалашуның киң колачлы процессы турында кыйммәтле дәлилләр саклана. 1920–1930 елларда ТАССРдан Донецк өлкәсенә киткән эшчеләр, укытучылар, журналистлар, медикларның нәсел дәвамчылары хәзер дә шунда яши.

Шахтер лампасының эволюциясен күзәтеп барырга, татар артистларының Донбасска гастрольләре турында белергә, 1920 елларның агитация плакатларын күргәзмәдә күрергә мөмкин. Экспозицияне чор әйберләре һәм татар мәдәнияте эшлеклеләренең мемориаль коллекцияләреннән экспонатлар тулыландыра.

«Татарстан – Донбасс: 100 ел тарих» күргәзмәсе белән 15 августтан 10 ноябрьгә «Юстиция тарихы» музей-мәгариф үзәгендә танышырга мөмкин булачак.  . Проектның кураторы Мокрополова Анастасия.