«Гаилә һәм мәктәп» һәм «Мәгариф» журналлары хезмәткәрләре Кайбыч тәҗрибәсен өйрәнә

Әлеге районга сәфәр чыгуыбызның төп сәбәбе «Мәгариф» журналы тарафыннан оештырылган «Авыл укытучысы» бәйгесенең абсолют җиңүчесе исеменә лаек булган Алсу ханым Хәмидуллина белән бәйле иде. Без булган Иске Чәчкаб төп мәктәбендә татарча милли рухта белем һәм тәрбия бирү серләрен өйрәнү, Кече Кайбычның «Сандугач» балалар бакчасы белән аралашу туган телебезгә мәхәббәтнең нәкъ менә авыл җирлегендә бөреләнүен тагын бер кат раслады. Олы Кайбыч мәктәбендә исә укучы һәм укытучыларның спорт хәм патриотик юнәлештә ирешкән уңышлары шаккатырды.