Шигърият бәйрәме

Татар академия дәүләт опера һәм балет театры яны мәйданында бүген татар халкының зур тантанасы шаулый. Биредә шигырь бәйрәме. Иҗатка гашыйк йөзләгән кешегә Габдулла Тукай үзе карап тора төсле. Шагыйрь һәйкәле янында дәүләт премиясе лауреатлары, артистлар, яшь әдәби талантлар чыгыш ясый. Чит төбәкләрдән килгән кунаклар да бар.

Крым татары Диләвер Осман бәйрәм кунакларын татар милләте турындагы фикере белән кызыксындырды.

«Төрек көчле дип әйтәбез. Шуны аңларга кирәк, татар көчле булганга гына, төрек көчле. Татар дөрес юл буенча бара. Әлеге юлдан тайпылмыйча атласак кына , милләт чирләрдән арына алачак», – диде ул.

Газинур Морат,  Ркаил  Зәйдулла, Рифә Рахман, Ренат Харис, Рәдиф Гаташ, Роберт Миңнуллин, Ләбиб Лерон, Рәмис Аймәт үз иҗади сүзләрен җиткерделәр.

Яш шагыйрьләр  Рүзәл Мөхәммәтшин, Булат Ибраһимов, Фәнил Гыйләҗев тә  Тукайга баш иеп, үз шигырьләрен  укыйлар. Бәйрәм дәвам итә.