Эльвира Солтанова туган телләрне өйрәтү буенча Россиянең иң яхшы 5 тәрбиячесе исемлегенә керде

20 сентября 2024 Мәгариф

19 сентябрь Казанның «Адымнар» полилингваль комплексында мәктәпкәчә учреждениеләр хезмәткәрләре арасында «Иң яхшы туган тел һәм әдәбият укытучысы – 2024» конкурсының йомгаклау этабы старт алды.

Бүген Казанның 99 нчы балалар бакчасы базасында сынауларның икенче көне. Педагоглар балалар белән тел һәм мәдәнияткә багышланган дәрес үткәрделәр, балаларны социализацияләүнең һәм ата-аналарны тел өйрәнүгә җәлеп итүнең педагогик техникасын күрсәттеләр.

Берничә минут элек кенә Казанның 346 нчы балалар бакчасы тәрбиячесе Эльвира Солтанованың туган телләрне өйрәтү буенча Россиянең иң яхшы 5 тәрбиячесе исемлегенә керүе билгеле булды.

Иртәгә, 21 сентябрьдә, соңгы сынау – мастер-класс булачак. Шулай ук җиңүче һәм призерларның исемнәре дә игълан ителәчәк. Тантаналы чара Идел буе физик культура, спорт һәм туризм университетында РФ мәгариф министры Сергей Кравцов катнашында узачак.