Казан Мэриясенең «Әминә» проекты презентациясе узды

Бәйрәмдә нәни тамашачылар «Әминә» исемле персонаж белән якыннанрак танышты, ачык һавада бергәләп проектның яңа серияләрен карый-карый, Әминәгә кушылып җырлады һәм биеде. Чараның алып баручылары – «Апуш.Нәниләр» мәктәп-студиясенең шәкерте Сәидә Галимова һәм «Апуш» татар балалар театр студиясе шәкерте Аслан Миргаязов шулай ук килгән балалар өчен төрле уеннар оештырды, бәйгеләрдә җиңүчеләргә истәлекле бүләкләр дә тапшырды.

Роликларның төп героинясы – Әминәне «Апуш» татар балалар театр студиясе шәкерте – Мәликә Бариева тавышландыра. Чарада ул да чыгыш ясады – Әминәнең «Ягымлы сүзләр» һәм «Аш бүлмәсе» җырын башкарды.

Килгән кунакларны сәхнәдән «Татармультфильм» анимацион студиянең директоры, «Әминә» мультигының продюсеры Азат Ганиев тә сәламләде. Ул роликларны әзерләү процессы турында сөйләп узды.

Фото: milli.kzn