Татар теленең электрон сүзлекләре бик актуаль

Галимҗан Ибраһимов исемендәге Тел, әдәбият һәм сәнгать институтының лексикография бүлеге мөдире Ринат Сәфәров «Татар-информ» агентлыгында узган матбугат конференциясендә бу елда татар теленең электрон сүзлекләрен караучылар саны артканын искәртеп китте.

«Татар теленең электрон сүзлекләре фонды 2014 елдан бирле үз эшен башкара. Әлеге фондта барлыгы 53 сүзлек урнаштырылган. Бүгенге көндә тәүлегенә 900 кеше порталга керә. 2023 елда керүчеләр саны азрак иде», – диде спикер.