Юллар, юллар… Асфальт юлдан җай гына кай тарафларга тәгәрисең син, сары автобус?

Һәр көн, 21 укучыны барлап, база мәктәбенә - белем сараена алып килә укытучы. Балакайларым, иртәнге 6да чыгып китеп, көн саен 34 чакрымнар әйләнеп кайтып, ардым, дип иркәләнергә дә вакытыгыз юк бит сезнең. Укытучы абый-апаларыгызның телендә бер генә сүз: БДИ. Уку өчен кадерле вакытыгызның бер өлешен көзнең бәрәңгесе, язның өмәләре, чәчәк түтәлләре “урласа да”, бердәм дәүләт имтиханнарында сезгә ташламалар каралмаган.

 Химия һәм биологияне атнасына берәр сәгать кенә укыса да, киләчәктә үзен ак халатлы табиб итеп күзаллаучы Фәнзилнең, бәлки, бераз үпкәсе дә бардыр. Тик сыйныфтагы ун укучының бишесе социаль-икътисадый профильне сайлаганда, күпчелеккә буйсынмыйча мөмкин түгелен аңлый ул...

Аттестат алганда, күзләрегездә шатлык яшьләре күрәм. Бүген бәйрәм! Мәктәп коридорының бер башы шәһәр мәктәпләренең актлар залына да алыштыргысыз итеп бизәлгән.

 Хатирәләрем сезнең белән уздырган ачык дәрескә барып тоташа. Китапны компьютер, интернет кысрыклап чыгарырга маташкан заманда, М.Маликованың “Чәчкә балы” повестен хәтта Илнурым да укып чыккан бит! Татар теле һәм әдәбияты укытучысы өчен моннан да зур бәхетнең булуы мөмкинме? Әнәс белән Азатым ясаган презентация дә уңышлы чыккан. Интерактив такта булганда, WiFi эшләгәндә, шәһәр музейлары, кино-театрлары бер якта торсын.

Автор сурәтләгән ике гаиләне чагыштырып, нинди мәгънәле әңгәмә оешты дәрестә. Сенквейн да төзедек, “тукталышлар” алымы белән дә укыдык. Дәрес ахырында тест эшләп, һәркайсыгыз “бишле” алган иде ул көнне. Федераль дәүләт белем стандартлары һәм Сингапур укыту алымнары сезнең өчен ят булса да, Ә.Рәхимовның иҗади үсеш технологиясе буенча уздырылган дәресләрнең нәтиҗәсе буларак, һәрнәрсәгә үз карашыгыз булган, кыю фикерле яшләр булып җитештегез.

 Мин сезгә бик рәхмәтле. “Мәгариф» өстенлекле илкүләм проекты кысаларында уздырылган бәйгедә Татарстан Республикасының иң яхшы укытучысы булып танылуымда сезнең өлешегезне 50% дип бәялим. 6 нчы сыйныфта якташ язучыбыз Радик Фәизовны кунакка чакыруыбыз хәтерегездәме? Шушы дәреснең язмасы “Мәгариф” журналында басылып, “Иң яхшы мәкалә авторы” исеменә лаек булдым.

 Яшь балалары булган укытучылырга бик уңай хәзер. Бер ишектән сабыен балалар бакчасына кертеп җибәрсә, икенче ишек - мәктәпнеке. Газизләребез өчен биш уку кабинеты да жәл түгел. Коридорны бүлеп ясалган сыйныф бүлмәләребез ныклап төзекләндерүдән соң шәһәр мәктәпләренекеннән бер дә ким булмады.

 Кызганыч, 31 майда шаулап чыгарылыш кичәсе узгач, янәшәдәге ишеккә 3 айга йозак эленә шул. Алинә, Рүзәл, Сабиналар әниләре белән мәктәпкә йөри инде хәзер. Зарар юк, без түзәргә күнеккән. Ни дисәң дә, Арча кадәр Арчасында урын булмагач, әниләр эшләгән авыл мәктәбендә урнашкан балалар бакчасы бөтен проблеманы хәл итте дә куйды бит! Шуңа күрә хатын-кыз укытучыларыбызга рульгә утырмый чара калмады.

 Тыныч. Ипотекага алган фатирың, йөреп эшләргә булса да эшең бар. 25 ел түләр өчен, менә шул эше генә булып тора күрсен инде...