KazanForum кысаларында «Хатын-кыз карашы» трегы ачылды

 

Бүген «Россия - Ислам дөньясы: KazanForum 2023» XIV Халыкара икътисади форумы кысаларында «Хатын-кыз карашы» трегы ачылды. Аны ТР Дәүләт Советының хатын-кыз депутатларының «Мәрхәмәт-Милосердие» берләшмәсе әгъзалары оештырды.

 

 

Трекның игътибар үзәгендә традицион гаилә һәм әхлакый кыйммәтләрне саклау, популярлаштыру, ана һәм баланы яклау, хәйриячелекне үстерү һәм җәмгыятьтә яхшы мөнәсәбәтләрен ныгыту мәсьәләләре тора.

 

 

«Хатын-кыз карашы» трегы традицион Казан форумы кысаларында быел беренче тапкыр уза. Анда дөньяның утызга якын иленнән танылган чит ил спикерлары катнаша.

 

«Бүген монда актив хатын-кызлар, бизнес вәкилләре җыелды, аларны кешеләргә ярдәм итү, актуаль социаль мәсьәләләрне хәл итү һәм җәмгыятькә файдалы булу теләге берләштергән. Без, хатын-кызлар, киң күләмле бизнес-проектларны гамәлгә ашырабыз, шул ук вакытта традицион кыйммәтләрне саклап калырга тырышабыз. Трекның ел дәвамында дәвам итәчәк интенсив нетворкингка старт бирүен бик теләр идек», – дип сөйләде «Мәрхәмәт-Милосердие» хатын-кыз депутатлар берләшмәсе җитәкчесе, Россия кооперация университеты ректоры Алсу Нәбиева.

 

Фәния Лотфуллина