Татарстанның иң чибәр кызы Чаллы шәһәрендә яши

Бүген Татмедиа журналистлары белән узган очрашуда «Мисс Татарстан» оешмасы президенты, ТР атказанган сәнгать эшлеклесе Изольда Сахарова әлеге  проектның асыл максатлары, бурычлары турында сөйләп узды.

—    «Мисс Татарстан» республика конкурсы төп игътибарны  кызларның табигый матурлыгына, белеменә һәм уңай сыйфатларына юнәлтә. 26 ел дәвамында оештырылып килгән конкурс мәгърифәти характерда уза. Без конкурсантларның чибәрлегенә генә түгел, аларның иҗади сәләтенә, интеллектуаль сыйфатларына, төрле очракларда үз-үзләрен тотышына да басым ясыйбыз. Конкурста 14 — 23 яшьтән катнаша алалар. Быел  безнең җиңүчебезгә 14 яшь. Бу факт күпләрдә зур дулкынлану уятты, чөнки «Мисс Россия» конкурсында 18 яшьтән генә катнашырга мөмкин. Безнең былтыргы «Мисс Татарстан» Россия конкурсында катнаша алмый калган иде,  быел «Мисс Россия»гә  ул барачак, — диде Изольда Сахарова.

«Мисс Татарстан – 2024» – Эвелина Габитова Чаллының 29 нчы гимназиядә укый һәм җиде яшеннән модель индустриясендә шөгыльләнә. Мәктәп укучысы инде «Россиянең беренче вице-яшь Гранд Королевасы – 2023», «Тамашачылар симпатиясенең яшь королевасы – 2023», «Икенче вице-мисс Grand Podium – 2023», «Мисс Очарование – 2022» титулларын һәм «перспективалы модель» конкурсының өченче урынын яулаган. Узган елның декабрендә Эвелина шул ук исемдәге конкурста «Мисс Чаллы – 2023» титулына ия булды. Эвелинаның иң зур хыялы – танылган модель булу. Яшь кызның тормышта үз кагыйдәләре дә бар. Ул, һәрнәрсәне булдырам, дип яши.

Журналистлар белән очрашуга шулай ук «Мисс Казан – 2024» Александра Кочергина да   килгән иде. Александрага 16 яшь. Модель мәктәбенә кадәр кыз нәфис гимнастика белән шөгыльләнгән. Спорт юнәлешендә уңышлары да бар. Казан чибәре киләчәктә дә үз язмышын спорт, туризм белән бәйләргә ниятли.

Материал, фото: Мөршидә Кыямова