65 нче мәктәптән кешеләрне эвакуацияләгәннәр

Янгын сигнализациясе эшли башлау сәбәпле, Казанның Шамил Усманов урамында урнашкан 65 нче мәктәпкә янгын сүндерүчеләр җыелган.
Бу хәл кичке сәгать алтыда булган. Бу вакытта мәктәптә ата-аналар җыелышы барган. Янгын сүндерүчеләр килеп җиткәнче, ата-аналар һәм мәктәпнең 20 хезмәткәре урамга үзләре чыккан. Вакыйга урынында беркем дә зыян күрмәгән.
Янгын сүндерүчеләр янгын чыкмаганлыгын, беренче катның вестибюлендә кыска ялганыш булуын ачыклаган, дип хәбәр итә «Татар-информ».

Диләрә БАТРШИНА