Казанда нәкъкашчылар җыелды

Казан Кремлендәге “Хәзинә “ милли сәнгать галереясында нәкъкашчы-каллиграфларның халыкара күргәзмәсе ачылды. Тантанада Төркия Республикасының Казандагы Генераль консулы Исмәт бәй Эрикан, Казахстан һәм Иран консуллыгы вәкилләре, Татарстан Республикасы мәдәният министры Ирада Әюпова катнашты.

Тамашачылар хөкеменә төрек нәкъкашчысы Ләвәнт Карадуман, Татарстан сәнгаткярләре  Владимир Попов, Нәҗип Нәкъкаш, Гөлназ Исмәгыйлова, Айзат Минһаҗ эшләре тәкъдим ителде. Каллиграфлар күргәзмәгә халык яратып йөрер дигән теләген җиткерде. Аерым алганда, төрек нәкъкашчысы Ләвәнт Карадуман: “Мин Казанга бик дулкынланып килдем. Дөресен әйтим: таҗлы вирус зәхмәте башланганнан соң оештырылган беренче зур күргәзмәдә катнашуым бу. Мин диндар кеше булмасам да,  җир йөзендә яратылган, барча мәхлукларга хәлифә итеп җибәрелгән адәм балаларының яшәү максаты Аллаһ ризалыгын алу булырга, шөкер итеп яшәргә тиешлеген яхшы беләм. Шул шөкер итүемне иҗатымда чагылдырырга тырыштым да”, – дип чыгыш ясады.

Күргәзмә бер ай дәвам итәчәк.

Рәшит Минһаҗ

 

Добавить комментарий

Ваш адрес email не будет опубликован.