Фәнни мәктәп фәнни-педагогик кадрлар әзерләү дәрәҗәсен күтәрергә ярдәм итәчәк

ТР Фәннәр академиясендә төрки телле китап тарихына багышланган ел саен үткәрелә торган «Татар гыйлеме» халыкара яшьләр фәнни мәктәбе башланып китте. Чараның төп оештыручысы – Г. Ибраһимов ис. Тел, әдәбият һәм сәнгать институты.

 

Җыенны институтның директоры, филология фәннәре докторы Ким Миңнуллин алып барды. Пленар утырышны филология фәннәре докторы, академик Дания Заһидуллина ачып җибәрде. «Фәнни мәктәп фәнни һәм фәнни-педагогик кадрлар әзерләү дәрәҗәсен күтәрергә, талантлы яшьләрне фән үсешенең өстенлекле юнәлешләре буенча фундаменталь фәнни тикшеренүләрдә катнашуга җәлеп итәргә, яшь галимнәрнең, аспирантларның һәм магистрантларның үзара аралашуын арттыруга ярдәм итәчәк», — дип сөйләде ул. 

Соңрак «Төркестанда татар полиграфларының роле һәм урыны» темасы белән филология фәннәре кандидаты  Сафиуллина Резеда Риф кызы, Азәрбайҗан Фәннәр академиясенең Мөхәммәд Физули ис. Кулъязмалар институтының бүлек мөдире Багиров Акрам Дахилоглы, Россия Фәннәр академиясенең Санкт-Петербург Тарих институты фәнни хезмәткәре Вовин Алексей Александрович, сәнгать белеме кандидаты, Уфа дәүләт сәнгать институтының дизайн һәм рәсем кафедрасы мөдире Әхмәдуллин Марс Лирон улы, Татарстан Республикасының Санкт-Петербург һәм Ленинград өлкәсендәге даими вәкиле Вәлиуллин Ренат Нәкыйф улы, Татарстан Республикасы Милли китапханәсенең кулъязмалар һәм сирәк китаплар бүлеге мөдире Заһидуллин Айрат Җиһангир улы һәм башка галимнәр чыгыш ясады.

Фәнни мәктәп 3 көн дәвам итәчәк. Программада чыганакларны өйрәнү фәне, сәнгать белеме, археография өлкәсендәге Россия һәм якын чит илләрдән әйдәп баручы галимнәрнең чыгышлары каралган. Чарада Үзбәкстан, Азәрбайҗан, Мәскәү, Санкт-Петербург, Уфа галимнәре, Татарстан Республикасы Фәннәр академиясе, республиканың фәнни һәм фәнни-мәгариф учреждениеләре, массакүләм мәгълүмат чаралары вәкилләре һ. б. катнашачак.