Мөселман календаре буенча  Рәҗәб ае башланды

Рәҗәб һәм Шәгъбан айлары – рамазан ае турында алдан хәбәр бирә торган айлар. Бу ике мөбарәк ай аша без изге рамазанга керәбез, ураза тотарга әзерләнәбез.

Рәҗәб–Аллаһы Тәгалә кан коюларны, низагларны тыйган дүрт айның берсе. Хәрәм айларда кылынган начар эш Аллаһ каршында башка вакытта кылынганнан начаррак, чөнки Аллаһы Тәгалә ул айларны хөрмәтләгән.

Рәҗәб аенда кылган изге гамәл–гыйбадәтләребез өчен Аллаһы Раббыбыз савапларны арттырып бирәчәк. Бу айда сәдакалар бирү, фәкыйрьләрне, мескеннәрне шатландыру, вакытында укылмаган намазларны каза кылу, “Ихлас” сурәсен ешрак уку–күркәм гадәт.