РФ Президенты балалары булган гаиләләр өчен бердәм пособие турындагы законга кул куйды

2023 елның 1 гыйнварыннан илдә 17 яшькә кадәрге балалары булган гаиләләргә бердәм пособие бирелә башлаячак. Ул гаиләдәге керемнең бер кешегә туры килгән өлеше төбәк хакимияте расланган бер яшәү минимумыннан азрак булган гаиләләргә түләнәчәк.
Вице-премьер Татьяна Голикова сүзләренә караганда, киләсе елдан бердәм пособие түләүгә 1,6 триллион сум акча тотылачак. Мондый сумма бер елга исәпләнгән.
Социаль ярдәм беренче атналарда исәпкә баскан йөкле хатыннарга; вакытлыча эшкә сәләтсез булган очракта һәм ана булу сәбәпле мәҗбүри социаль иминләштерелергә тиеш булмаган гражданнарга бала карау буенча, 3 яшькә кадәр, 3 яшьтән 7 яшькә кадәр һәм 8 яшьтән 17 яшькәчә булган балаларга айлык түләүләр буларак каралган.