Беренче әти-әниләр комитеты: тәнкыйть түгел, тәкъдим мәйданчыгы

31 мая 2021 Мәгариф

Иртәгә Балаларны яклау көнендә ТР Яшьләр эшләре министрлыгы тарафыннан беренче тапкыр әти-әниләр комитеты мәйданчыгы ачылачак. Чарада 20 ләп әти-әни катнашачак. Комитетның төп максаты проблемалар турында гәпләшү, тәнкыйтъ фикерләр белән уртаклашу, төрле сорауларга җавап эзләү түгел, ә әти-әниләргә үзләренә тәкъдим белән чыгу мөмкинлеген бирү, – дип хәбәр итте ТР яшьләр эшләре министры урынбасары Алла Кондратьева балаларны яклау көненә багышланган матбугат конференциясендә.
Беренче эксперт әти-әниләр мәйданчыгында төрле кызыклы темалар күтәреләчәк. Ләкин беренче утырышның төп темасы -балаларның җәйге ялын планлаштыруга җаваплы карау, лагерьларда гына түгел, шулай ук өйдә ял көннәрендә мәгънәле итеп үткәрү. Комитет проблемалардан чыгу юлларын күрсәтүче берләшмә булыр дигән өметтә кала оештыручылар. Ботен республика әти-әниләренә 16.30 да комитетның беренче онлайн утырышына кушылырга мөмкин. Биредә комитетның рәисе дә сайланачак.
Шулай ук балаларны яклау көнендә төзекләндерүдән соң уникаль «Восток» балалар сәламәтләндерү лагере ачылачак. Чарада ТР Президенты Рөстәм Миңнехановның катнашуы көтелә. Иртәгедән 40 сәламәтләндерү лагерьлары үз ишекләрен ача.

Таңсылу ГАБИДУЛЛИНА

Язмага реакция белдерегез

Реакция язылган инде

Комментарийлар

Теркәлергә

Сораштыру: укучылар БДИда шпаргалкалар кулланырга җыенамы?

31 мая 2021 Мәгариф

Күпчелек унберенче сыйныф укучылары Бердәм дәүләт имтиханына (БДИ) шпаргалкалар ясарга җыена. Сораштырылучыларның 82 проценты шпаргалкалар алырга җыена. Шул ук вакытта аларның дүрттән бер өлеше генә (23 процент) алардан сиздермичә файдалана алачак дип саный. Шулай ук укучыларның 40 проценттан артыгы игътибарлылыкны арттыру өчен медикаментлар һәм биохимик өстәмәләр кабул итәргә җыенуларын белдергән.
Популяр препаратлар арасында чыгарылыш сыйныф укучылары тынычландыргыч, шул исәптән валерианканы (36 процент), ноотроплар төркеме препаратларын (34 процент), глицин (24 процент), азык өстәмәләрен (19 процент), психостимуляторларны (ун процент) кулланачагын әйткәннәр. Бу хакта РИА Новости хәбәр итә.
Институт директоры Анна Маркс билгеләп үткәнчә, мәктәп укучыларының медикаментларны, бигрәк тә психотропларны кабул итәргә әзер булуы борчу тудыра. «Кайдадыр сораштырылучыларның чиреге, неврозларга каршы көрәшү өчен, ата-аналар аларны бирүләрен таныды», - дип хәбәр итте Маркс.
Шулай ук укучыларның БДИда үз белемнәрен нинди уртача баллга бәяләүләре ачыкланды – бу 70 баллга якын. Ә гуманитар фәннәрдән балл җыю буенча чыгарылыш сыйныф укучыларының өметләре зуррак.